O alcalde de Negreira, Manuel Ángel Leis Míguez, seguirá ostentando a vicepresidencia da Asociación de Concellos do Camiño de Fisterra e Muxía, á que accede á presidencia o alcalde de Fisterra, José Marcote Suárez, tralos cambios adoptados na asemblea pola decisión do actual alcalde de Dumbría, José Manuel Pequeño de non presentarse á reelección.
Acompañan aos rexedores de Fisterra e Negreira, a concelleira de Cee, Emma Trillo Lojo, en calidade de secretaria, e o concelleiro do Concello de Corcubión, Lalo Insua, coma tesoureiro. En breve daranse a coñecer os novos plans que a entidade supramunicipal ten para este ano 2023.
O Concello de Negreira recoñece neste 2023 a traxectoria de María López Sández (Lugo, 1973), coa entrega do Premio 8 de Marzo na súa sétima edición. Este galardón naceu para recoñecer o traballo e o papel das mulleres vinculadas con Negreira ao longo da historia, xa consolidado como o acto central polo Día Internacional da Muller. A entrega terá lugar o propio mércores, día 8 de marzo, nun acto aberto á veciñanza que se vai celebrar no auditorio Afonso Eanes do Cotón, a partir das 20.00 horas.
Ao longo de trece cursos académicos, María López Sández tivo un papel esencial á hora de preparar ás novas xeracións do IES Xulián de Magariños como mestra no instituto, onde foi quen de transmitirlles moito máis que coñecementos teóricos, deixándolles dúas calidades que forman parte da súa traxectoria vital e profesional: a súa vocación didáctica e a súa paixón pola literatura. Dúas características que a acompañaron ao longo de toda a súa carreira e que, hoxe, avalan o seu rol como catedrática en excedencia de ensino secundario, como profesora na área de Didáctica da Lingua e a Literatura e tamén como vicedecana na facultade de Ciencias da Educación da Universidade de Santiago de Compostela (USC).
Mestra, investigadora e tamén autora. Nesta última faceta, López Sández tamén despuntou, colleitando varios galardóns: en 2007, recibiu o Premio de Ensaio Ramón Piñeiro pola obra Paisaxe e nación. A creación discursiva do territorio, no 2012 fíxose co Premio Repsol de Narrativa breve pola novela A forma das nubes e foi finalista do Premio Novela por Entregas de La Voz de Galicia (2014) coa súa obra “O Faro escuro” e do certame Raíña Lupa (2020) con “A noite da Deusa”.
O uso das humanidades dixitais e os sistemas de información xeográfica para a xeración de mapas literarios son dous dos seus campos de investigación. Un ámbito ao que hai que sumar, ademais, unha terceira figura central: a de Rosalía de Castro.
O seu firme compromiso coa lingua e a cultura galegas desde unha perspectiva multidisciplinar supuxo o seu nomeamento, no 2022, como Académica Electa de Número pola Real Academia Galega.
O Servizo de Atención Temperá, da agrupación dos concellos de Negreira e Val do Dubra, está atendido por catro profesionais: unha logopeda; unha psicomotrocista; unha terapeuta e unha psicóloga clínica. Actualmente, soporta a segunda maior cifra de usuarios con diversidade funcional de toda Galicia. Segundo a súa coordenadora, María Jesús Cao Meitín, falamos de arredor de 65 usuarios, centrándose o seu labor en idades entre cero e seis anos.
Este servizo, un dos máis importantes que presta actualmente o concello, colabora coa Asociación Xanela, integrada por traballadoras do ámbito da educación social e pedagóxica, na posta en marcha dun proxecto piloto de apoio á diversidade funcional, creando espazos seguros e de axuda, e que foi presentado en Radio Negreira.
Este proxecto consiste na creación dun “Espazo seguro”, na Casa do Concello, que é empregado como referencia cando unha persoa se sinta desorientada ou perdida e, en segundo lugar, unha serie de puntos de axuda que estarán en distintos locais participantes no proxecto. Estes puntos de axuda –arredor de 55 en Negreira-, están sinalizados cunha pegatina a través dun pictograma e conten un código QR con información relativa ao proxecto: Unha mirada hacia a diversidade funcional: Espazo seguro. A iniciativa persegue a inclusión.
Conversa en Radio Negreira:
https://bit.ly/3xPce54
A compañía galega A Xanela do Maxín levou a cabo a preestrea do seu espectáculo: Coliño; unha obra musical e sensorial para a primeira infancia e que foi creada a través dunha residencia desenvolvida no Auditorio Afonso Eanes do Cotón. A obra, dirixida ao público familiar con crianzas dende os seis meses ata os tres anos, dirixida por Celtia Figueiras e Topo Vidal, e con música de Lois Prado. Conta co apoio económico do Agadic da Xunta de Galicia. Ten unha duración de corenta minutos.
Trala preestrea en Negreira, a súa estrea oficial foi programada para este domingo na cidade de A Coruña, no Centro Sociocultural Ágora, para a cal xa están todas as entradas esgotadas, a un prezo de 6 euros. É unha das actividades do festival Bebescena 2023 que promove o Concello da Coruña.
A Xanela do Maxín é unha compañía de teatro visual, de títeres e obxectos en Galicia profesional, que crea propostas escénicas de calidade dirixidas a un público infantil, familiar e xuvenil.
Ficha artística:
- Intérpretes: Celtia Figueiras, Topo Vidal e Lois Prado
- Autoría: José Manuel Breijo "Topo Vidal"
- Dirección e adaptación: Celtia Figueiras e Topo Vidal
- Escenografía e deseño de iluminación: Daniel Rodríguez
- Deseño son: Lois Prado
- Vestiario: Celtia Figueiras
- Música: Lois Prado
“Unha mirada hacia a diversidade funcional: Espazo seguro”, é un proxecto no que se inscribe a iniciativa de conformar espazos seguros, dentro dos concellos de Val do Dubra e Negreira, a través da Asociación Xanela, e do Servizo de Atención Temperá (SAT), da agrupación de concellos de Negreira e Val do Dubra, orientado a visibilizar e sensibilizar sobre a diversidade funcional, a través dun díptico onde explícase o seu obxetivo entre o tecido empresarial de Negreira.
En qué consisten os espazos seguros? Trátase de, mediante a difusión de información, sensibilizar e concienciar a toda a cidadanía sobre a diversidade funcional. Espacio Seguro componse dun punto de encontro situado no Concello, que se empregará como referencia cando unha persoa se sinta desorientada ou perdida, e en segundo lugar, puntos de axuda, que serán distintos locais e establecementos participantes no proxecto.
Os participantes colocarán unha pegatina no escaparate, onde se perciben as palabras: “Espazo seguro”. Isto indica, que ese establecemento ten conciencia sobre o que é a diversidade funcional e que será, coma o propio nome do proxecto indica, un espazo seguro para as persoas con diversidade funcional, tanto en caso de necesidade como á hora de realizar unha comptra no seu día a día.
Polo tanto, a finalidade do proxecto é xerar espazos adaptados ás necesidades das persoas con diversidade funcional, fomentando que se sintan seguras e cómodas á hora de desenvolverse na comunidade. Para iso, proporcionase unha microinformación onde se plasman pequenas recomendacións sobre cómo actuar ante a diversidade funcional. Por exemplo, adoptar un tono de voz claro e sosegado, e conformar un espazo tranquilo sin subestimar as capacidades da persoa.
Os membros da Asociación Xanela iran polos diferentes locais e comercios presentando o proxecto de espazo seguro, e proporcionando un folleto que explica visualmente o proxecto e da pegatina que dará visibilidade.
Páxina 19 de 257
