O auditorio Afonso Eanes do Cotón volverá a acoller este venres 10 de febreiro, a XI Gala do Deporte na que se recoñecerá aos mellores deportistas e clubs de 2022 nun evento que comezará ás 21:00 horas. Non faltarán as actuacións artísticas e a presenza dun padriño moi especial: Fran González, o mítico 10 e capitán do Superdépor na década dos 90 en que o club herculino logrou os seus maiores fitos deportivos como unha liga de Primeira División no ano 2000 e dúas Copas do Rei (1995 e 2002), así como tres Supercopas de España (1995, 2000 e 2002). Fran é un dos futbolistas máis queridos que militou no RC Deportivo, quen comezou a súa traxectoria coma deportivista no ano 1988 e rematouna no 2005. Tamén foi internacional absoluto coa Selección Española (1993-2000), con dezasete partidos e dous goles. Desputou a fase final da Eurocopa 2000 e é pai do xogador Nico González, actualmente no Valencia CF.
Asemade, durante a XI Gala do Deporte entregaranse os seguinets premios:
- Mellores deportistas promesas
- Mellor deportista
- Mellor club
- Recoñecemento traxectoria
- Recoñecemento colaboración
- Recoñecementos especiais do xurado
Unha das grandes eivas históricas nas comunicación viarias de Negreira e a súa comarca, teñen encarrilada unha solución de futuro, tras moitos anos caída no abandono. A Ponte Ínsua, o estreito viaducto sobre o río Tambre, que une Negreira con Brión, ten máis preto a súa ansiada ampliación da plataforma. Cun elevado tráfico diario, na actualidade conta cun ancho de 3,5 metros –un carril- polo que non permite a circulación nos dous sentidos e ten unha limitación de peso para 16 toneladas.
O pasado venres 3 de febreiro, celebrouse na sede da Deputación da Coruña unha importante reunión presidida por Valentín González Formoso, presidente da institución, e mailos alcaldes de Negreira, Manuel Ángel Leis Míguez, e Brión, Pablo Lago Sanmartín, a través dunha solicitude de mellora conxunta dos dous concellos.
Na reunión cos técnicos do servizo de Vías e Obras da Deputación da Coruña, avaliuse cal das distintas opcións expostas no estudo técnico previo realizado sería a máis viable técnica e economicamente para mellorar a seguridade garantindo o tráfico simultáneo nos dous sentidos de circulación, algo que agora non se pode facer, dado que a ponte actual conta cun ancho útil de apenas 3,50 metros.
A este problema súmase a limitación do peso autorizado a 16 toneladas, o que perxudica gravemente ao sector do transporte e obriga a non poder desviar o tráfico pesado da zona monumental do pazo do Cotón, polo que segundo sinalaron os alcaldes, moitos vehículos pesados ou os tractores vense na obriga de dar rodeos de ata 20 quilómetros polas limitacións da ponte.
Solución prevista
Para arranxar estas eivas, en primeiro lugar, a Deputación realizará un estudo das características estruturais da ponte, co obxectivo de garantir que a subestrutura actual soporte a actuación prevista, que consistirá na instalación dunha nova plataforma, máis ancha e elevada que a actual.
A anchura total prevista do novo taboleiro da ponte será de 9,80 metros, con carrís en ambos sentidos de 3 metros, beiravías de 0,50 metros, beirarrúa de 1,50 metros e espazos para barreiras de 0,65 metros.
Ademáis de permitir o tráfico seguro nos dous sentidos simultaneamente, as obras habilitarán un paso peonil seguro do que o viaduto carece a día de hoxe.
A actuación suporá un investimento aproximado de 1,5 millóns de euros e esixiría o recrecido das pilas nuns dous metros aproximadamente, dotándoas dos reforzos necesarios. Nos estribos sería necesario acometer tamén ampliacións laterais para acomodar a nova anchura de 9,80 metros e dotalos de apoios dobres, o que permitiría transferir a torsión acumulada ao longo do taboleiro.
As operadoras de telefonía móbil continúan a ofrecer en Negreira servizos móbiles de nova xeración, 4G e 5G, nas bandas de 700 e 800MHz. Esta nova tecnoloxía permitirá á veciñanza gozar de servizos de datos móbiles de alta velocidade, mellorará a cobertura no interior de edificios e ampliará a extensión xeográfica.
As tres principais operadoras de telefonía móbil: Movistar; Vodafone e Orange, avanzan que nas vindeiras semanas realizarán o proceso de implantación dos servizos de telefonía móbil de nova xeración, 4G e 5G, sobre as bandas de 800 e 700 MHz, respectivamente, o que permitirá á cidadanía gozar de conexións móbiles de alta velocidade cunha mellor cobertura no interior dos edificios e maior extensión xeográfica.
Para garantir a compatibilidade da nova tecnoloxía coa televisión dixital terrestre (TDT), Llega700 é a entidade posta en marcha polos operadores para solucionar calquera afectación na recepción do sinal de televisión.
Principais vantaxes
Coa nova rede móbil abriuse a porta a innovadores servizos e aplicacións,ademais de proporcionarsignificativas melloras tanto na velocidade de descarga, como de envío de datos (fotos, música ou contidos audiovisuais de alta definición) ou permitir sacar o máximo partido a aplicacións en liña, como os videoxogos.
Compatibilidade
De cara a garantir a compatibilidade, Llega700 presta unha serie de servizos gratuitos tales como un procedemento correctivo tralo acendido das estacións, polo cal Llega700 encargarase de atender aos usuarios afectados, xestionando e resolvendo posibles afectacións sen coste algún.
Para xestionar estes servizos, están a disposición dos cidadáns un número de teléfono de atención gratuito (900 833 999) e unha páxina web: www.llega700.es
A Corporación municipal de Negreira celebra o mércores, día 8 de febreiro de 2023, unha sesión extraordinaria do Pleno, a partir das 20:00 horas, coa seguinte Orde do día:
1º.- Plan provincial de cooperación ás obras e servizos de competencia municipal (Plan único de concellos) “POS+ 2023”.
2º.- Plan provincial de cooperación ás obras e servizos de competencia municipal (Plan único de concellos) “POS+ ADICIONAL 1/2023 Gastos sociais extraordinarios”.
O alcalde, Manuel Ángel Leis Míguez, representou a Negreira este pasado sábado na sexta gala dos Premios Youtubeiras, a correspondente ao ano 2022 e celebrada na localidade de Carballo. O premio rede galardoa a cancel A Lobeira today e, o premio do Público foi para o vídeo Bembibre coas Tanxugueiras, obra de Xabi Gómez.
Ademais, o galardón á Canle recoñeceu a Toxío, mentres que o de Youtubeira/o do ano foi para Neeumatiko e o de Youtubeira/o revelación recaeu en Histérikas histórikas. E o galardón ao mellor vídeo foi para Eduardita, de Piratas sne parche , mentres que a canle Falemos do Reino de Galicia conseguiu o premio Calidade Lingüística e Pinguado-Laura Veiga fíxose co galardón Pioneiro.
Youtubeiras é unha iniciativa organizada polos servizos de normalización lingüística dos concellos de Ames, A Baña, Carballo, O Grove, Moaña, Negreira, Pontevedra, Rianxo, Ribadeo, Rois, Santiago de Compostela e Teo, das universidades da Coruña, Santiago e Vigo e da Deputación da Coruña.
Saber máis: https://bit.ly/3kNaDJz
Páxina 12 de 248
