O Campamento Urbano Respira, a desenvolverse durante os meses de xullo e agosto, nas instalacións do CEIP O Coto, está dirixido a familias con menores de 3 anos (escolarizados) a 12 anos, e a oferta de prazas é limitada. O prezo por usuario/a, é de 100 € ao mes, e 50 € á quincena. O segundo irmán terá un desconto do 50%.
Requisitos de acceso ó servizo (poderán acceder ó mesmo sempre que cumpra os dous requisitos) :
- Familias empadroadas no concello de Negreira.
- Familias nas que ambos proxenitores ou titores legais estean traballando ou en situación de busca activa de emprego ou formación laboral.
Para a adxudicación das prazas terase en conta a orde dos seguintes criterios recollidos no Regulamento do “Programa Negreira Concilia (Madrugadores e Merendas), Diververán (BOP 8 de marzo de 2022, núm. 45):1º criterio.- Familias que aporten Informe Social que indique a necesidade do servizo en base a circunstancias socioeconómicas e familiares.
2º criterio.- Familias con fillas/os de mulleres vítimas da violencia de xénero.
3º criterio.-Familias monoparentais.
4º criterio.- Familias numerosas.
5º criterio.- Familias nas que algún das/os proxenitores teñan o seu posto de traballo no concello de Negreira.
6º criterio.- Calquer usuario/a.
O campamento abarca desde o 1 de xullo ata o 31 de agosto, podendo as familias elexir as quendas que necesiten, quedando distribuídas da seguinte maneira co seu correspondente prezo público recollido na ordenanza (11 de marzo de 2022):
1ª QUENDA: DO 1 AO 15 DE XULLO
2ª QUENDA: DO 16 AO 31 DE XULLO
3ª QUENDA: DO 1 AO 15 DE AGOSTO
4ª QUENDA: DO 16 AO 31 DE AGOSTO
Documentación:
- Modelo normalizado de ficha de inscrición
- DNI dos responsables do menor
- Libro de familia, sentenza ou resolución administrativa que acredite a relación xurídica entre ambos
- Tarxeta sanitaria do/a menor
- Declaración do IRPF e no caso de non presentala certificación negativa
- Xustificante bancario de ingreso do prezo público
- Xustificante da situación de emprego (Informe vida laboral, última nómina, pago último recibo de autónomos).
- Xustificante da necesidade do servizo por incompatibilidade horaria( certificado de demandante de emprego, xustificante de realizar unha busca activa de emprego, xustificante de asistencia a accións de formación laboral).
O horario do campamento será de 8:30 a 14:30 horas. As familias poderán facer uso do servizo en función das súas necesidades permitindo a entrada e saídas flexibles. Para o bo desenvolvemento das actividades programadas, recoméndase a aquelas familias que non vaian a facer uso do horario completo do campamento, incorporarse ao mesmo sobre ás 10:00 h. e saída a partir das 13:30h.
Exención e bonificación
Segundo as circunstancias da unidade familiar aplicaranse os seguintes descontos:
1.- Exención: A emisión dun Informe Social do departamento de servizos sociais que indique a necesidade do servizo sen que haxa posibilidades económicas para abonar o custo do mesmo conlevará a exención da cota.
2.- Bonificación: Cando asistan ao mesmo servizo varios irmáns de xeito simultáneo, o segundo irmán e sucesivos terán un desconto dun 50%.
O persoal técnico responsable do servizo poderá requerir outra documentación complementaria ou adicional que se precise.
As solicitudes poden presentarse de xeito telemático, a través da sede electrónica do Concello (https://negreira.sedelectrónica.gal), ou de xeito presencial no Rexistro xeral do Concello de Negreira, en horario de 9:00 h a 14:00 h de luns a venres, desde o 13 ao 25 de maio.
Datos adxuntos:
Ficha
Regulamento Campamento
Ordenanza fiscal Campamento
A Unidade de Atención Temperá de Negreira e Val do Dubra pasou a formar parte dende o mes de marzo de 2022, da Rede Galega de Atención Temperá. A UAT concíbese coma un espazo biopsicosanitario que realiza intervencións dirixidas á rapazada de 0 a 6 anos, a súa familia e o seu entorno. Na actualidade, atende a 46 nenos e nenas. Os luns, martes e mércores nas instalacións de Negreira, situadas na rúa de Castelao. Os xoves e os venres, en Val do Dubra. O horario é de 9:00 a 14:00 horas.
A Unidade de Atención Temperá de Negreira e Val do Dubra confórmana catro especialistas que se distribúen nas áreas: conductal; cognitiva, linguaxe e psicomotora. Trátase dun equipo interdisciplinar no cal se realizan tarefas de acción nas intervencións e de coordinación tanto a nivel interno coma en outros organismos da contorna.
En continuidade coa atención dos menores con diversidade, dende o Concello de Negreira xerouse un espazo de traballo para menores de 6 a 14 anos, a través do Servizo Terapéutico Municipal, cuxa profesional encargada de coordinar a UAT e o servizo, é a logopeda, María Jesús Cao Meitín. O servizo municipal ofrece unha atención especializada para atender as necesidades específicas, dándolle continuidade á atención realizada ata os seis anos.
Ámbitos de intervención
A integración dos menores no seu entorno realízase nos ámbitos “psicolóxicos, educativos, de apoio… de forma que se xeneren interaccións en condicións axeitadas”, subraia María Jesús Cao, quen engade que para apoiar todo isto, existe “o Manual de Boas Prácticas da Atención Temperá, creado pola Confederación Española de Organizaciones en favor de las Personas con Discapacidad Intelectual”, que ademais considera o obxeto de intervención como tridimensional: neno; familia e entorno.
Sobre os motivos de demanda, Gemma González, responsable da área de psicomotricidade, alude ás dificultades de linguaxe “expresivo, comprensivo e lectoescritura”, e a nivel psicolóxico “como conduta, xestión emocional, autoconcepto…, e o cognitivo coa planificación, inflexibilidade cognitiva; a psicomotricidade como o desenvolvemento motor, ou a pinza dixital”, segundo explica Gemma. Tamén figuran as funcións executivas (atención, memoria), ou adaptativo (autonomía, actitudes hacia a vida); entre outras.
Procedemento ante unha demanda
Unha vez recibida unha demanda, derivados polos servizos de Pediatría, Ensinanza Infantil, municipais ou familia; realízase unha folla de derivación e unha consulta de acollida para coñecer aos menores e familias. “Facemos unha entrevista de evaluación inicial coas país, onde se organiza a información sobre o desenvolvemento en aspectos como saúde, linguaxe, autonomía, ou ambiente familiar”, afirman.
Aparte de evaluar ao menor no espazo en temas cotidiáns como gustos, intereses e a interacción no grupo de iguais, se procede a realizar unha sesión de valoración na que poner en común o observado e decidir a posibilidade de incorporar ó menor “marcando os obxectivos de intervención e tendo en conta os horarios”.
Escoita a entrevista en Radio Negreira
O secretario xeral de Cultura, Anxo M. Lorenzo, participou hoxe cando á alcaldesa accidental, María del Mar García Vidal, na presentación do XI Certame de Poesía Xosé Manuel López Ardeiro durante un acto no que fíxose entrega da edición do poemario gañador da última edición, e que se celebrou no salón de plenos da Casa do Concello. Estiveron acompañados polo presidente do xurado, José Antonio Ponte Far, e mailo membro do mesmo, o poeta Xulio López Valcárcel, en representación de Medulia Editorial coma editor do libro, así coma familiares do finado poeta de Logrosa, entre outros.
A obra gañadora en 2021 foi Furtivas, cuxo autor é Rafa Vilar, natural de Cee e filólogo e escritor, sendo un dos promotores do Batallón Literario da Costa da Morte. O libro está composto por 70 poemas que foron editados nun libro por Medulia Editorial como parte do premio que entrega a Consellería de Cultura, dunha edición total de 300 exemplares, aparte do premio en metálico de 2.500 euros que xa lle foi entregado en decembro pasado durante o acto do fallo do xurado por parte do Concello de Negreira.
Anxo M. Lorenzo salientou o apoio da Xunta a certames como o Xosé M. López Ardeiro de poesía que dende hai once anos organiza o Concello de Negreira co apoio da Xunta, e engadiu: «Esta iniciativa constitúe ademais unha homenaxe ao poeta negreirés, cuxa frutífera obra pervive a través deste certame e das propostas que a el se presentaron nestas dez edicións», apuntou.
Este acto celebrado hoxe serviu para presentar unha nova edición do certame, a undécima. O prazo de presentación das obras vai do 26 de xullo ao 1 de decembro. A contía do premio repite coma na edición de 2021: a publicación do poemario gañador por parte da Dirección Xeral de Cultura, coa entrega dun lote de exemplares, así coma 2.500 euros de premio en metálico por parte do Concello de Negreira. O segundo finalista recibirá un premio consistente en 500 euros en metálico por parte do Concello de Negreira.
O fallo do xurado darase a coñecer nun acto a celebrarse no Auditorio do Centro Sociocultural, o venres, día 16 de decembro de 2022.
Os poemarios deben ser orixinais, inéditos e non ter sido premiados con anterioridade en calquera outro concurso ou certame. Deben estar escritos en lingua galega e terán unha extensión mínima de 350 versos e máxima de 700, escritos con tipografía de imprenta (tipo Arial 12 ou similar), a dobre espazo, e con absoluta liberdade do autor/a en canto a estrofas, medida e rima. Os participantes deben presentar unha copia impresa e outra dixital (en formato Word ou pdf), sen sinatura, e facendo constar neles soamente o título e o lema. Noutro sobre deberán achegar no seu interior: o lema xunto co nome, dous apelidos, fotocopia do D.N.I., e número de teléfono do autor/a, e no exterior de dito sobre consignarase o lema e o certame ao que se presenta. Compre sinalar que só se abrirán os sobres dos poemarios premiados.
Os traballos deberán ser entregados na Delegación de Cultura e Deportes, na primeira planta da Casa da Cultura, na Carreira de San Mauro, número 11 (15830 Negreira – A Coruña). Mais información: 981 885 886 ou a través do enderezo: Este enderezo de correo está a ser protexido dos robots de correo lixo. Precisa activar o JavaScript para velo..
O Consello da Xunta vén de dar luz verde este xoves 19 de maio, ao Decreto polo que declara ben de interese cultural (BIC), na categoría de monumento, ao conxunto patrimonial de A Pontemaceira, entre os concellos de Negreira e Ames. Remata desta maneira un longo proceso iniciado no ano 2017 por iniciativa conxunta dos concellos de Ames e Negreira, quenes solicitaron este recoñecemento para acollerse a unha declaración contemplada na Lei do Patrimonio Cultural, do ano 2016.
Para a declaración de A Pontemaceira como BIC, a Xunta solicitou o ditame de órganos consultivos coma o Consello da Cultura Galega, a Universidade de Santiago de Compostela e, a Real Academia de Belas Artes sobre o valor cultural desta infraestrutura histórica de enxeñería en pedra.
Todos os informes solicitados foron favorables ao recoñecemento, recalcando o seu carácter histórico e maila súa antigüidade, a súa influencia na configuración do territorio, a súa calidade construtiva e o estado de conservación, xunto coa documentación que demostra a súa autenticidade.
O alcalde de Negreira, Manuel Ángel Leis Míguez, congratulouse desta agardada nova: «Agardemos que sirva para outorgarlle unha maior protección e traballos de conservación, ante os danos na súa estructura por parte da Xunta, xa que tanto Ames como Negreira levamos pedíndolle unha intervención nos muiños, na presa e na ponte, que non acaba de producirse», indicou o mandatario municipal.
A declaración BIC inclúe no catálogo do patrimonio cultural unha trintena de hórreos, cruceiros e muíños, sometidos ao mesmo réxime de protección que o resto de inmobles que integran o conxunto, facendo do conxunto de A Pontemaceira unha paraxe natural e patrimonial, única do Camiño de Fisterra e Muxía.
O vello viaducto de pedra foi levando entre os séculos XIII e XIV polo poder eclesiástico de Compostela, e conserva a estrutura clásica medieval, aínda que o seu estado actual é froito da restauración acometida no século XIX para liquidar unha ruína documentada en 1792, que impedía a súa utilización. En 1987 sufriu outro desmoronamento parcial, acometendo a Xunta a súa restauración entre o 1991 e o 2001, con obras complementarias dos concellos de Ames e Negreira na súa contorna.
Despois da reunión da Comisión de Baremación, celebrada o pasado venres, día 13 de maio de 2022, aos efectos de valorar as solicitudes de novo ingreso así como a listaxe de agarda na Escola Infantil Municipal do Concello de Negreira para o curso 2022-2023, publícanse as listas provisionais, despois de efectuado o sorteo para as prazas de comedor.
As presentes listaxes sométense a información pública polo prazo de 10 días hábiles. Unha vez rematado este prazo, a Alcaldía ditará o decreto coas listaxes definitivas e abrirase o prazo de matrícula, o cal será do 1 ao 15 de xuño, en horario de 9.00 a 14.00 horas na propia Escola Infantil, con previa cita no número de teléfono: 981 881 858.
Por outra banda, e á vista da problemática coas prazas de comedor que conleva que moitos nenos/as non poden acceder á Escola Infantil nos horarios solicitados e vista a situación de excepcionalidade deste curso escolar, comunícase que dende o Concello de Negreira iniciáronse as oportunas xestións para tratar que tódolos rapaces que foron convocados para o sorteo público, poidan acceder a dito servizo. Para iso, pedirase certificación acreditativa dos horarios laborais de ambos proxenitores e levaranse a cabo as comprobacións oportunas.
Páxina 36 de 258
