O Concello de Negreira pon en marcha un novo sistema de notificación e xestión de incidencias urbanas para os veciños e visitantes.

A plataforma EMERXIA permite ós usuarios comunicarse co concello dun xeito rápido e sinxelo, tan só con acceder a ela dende calquera dispositivo conectado a internet. Cada incidencia xeolocalizase de forma automática para facilitar a súa busqueda.

O usuario pode achegar fotografías e comentarios, e estará permanentemente informado vía correo electrónico do proceso de xestión, evolución e resolución da súa incidencia.

EMERXIA

A veciñanza das parroquias de Campelo, Gonte e Aro, afectada polo Acordo de Reestructuración Parcelaria, está convocada a unha xuntanza informativa que terá lugar o martes día 3 de abril, ás 10:30 horas, no Local Social de Aro, coa que se iniciará a fase de exposición e enquisa pública previa ao acordo de reestructuración parcelaria, a cal estará aberta por un periodo de 1 mes, segundo informa o Servizo de Infraestructuras Agrarias dependente da Consellería de Medio Rural.

Nesta xornada informativa, e ao longo do periodo establecido, entregarase aos titulares de fincas, un documento resumo, no que se relacionan as fincas de reemplazo que se lles asignarán, ao tempo que quedarán expostos os planos que tamén se poderán ver na web da Xunta de Galicia, no seguinte enlace:

http://mediorural.xunta.gal/nc/areas/infraestructuras/concentracions_parcelarias/publicacions/

Durante dito prazo, as persoas afectadas poderán achegar, por escrito e debidamente rexistradas, as alegacións que estimen oportunas.

Jorge Crespo Arias acadaba esta pasada fin de semana unha fantástica cuarta posición no cros para maiores de 35 anos do  Campionato de Europa de Atletismo en categoría de veteranos baixo teito, celebrado en Madrid, mostrándose moi valente ao tirar do grupo, se ben finalmente non puido entrar no podio individual e por equipos.

A nosa noraboa para Jorge Crespo, todo un exemplo de deportista e orguio para Negreira por ternos representado en campionatos autonómicos, nacionais e agora tamén, de Europa. 

Medalla de bronce para Carla Rodríguez

A karateca negreiresa Carla Rodríguez, pertencente á Escola Akai Ryu, acadou a medalla de bronce grazas ao terceiro posto na modalidade de kata por equipos no Campionato de España Sénior celebrado a pasada fin de semana na localidade de Tomares, en Sevilla.

Carla Rodríguez estivo acompañada no equipo de kata sénior feminino por Ariadna Rocha, do Club Bunkai de Ferrol, e Carla Fernández, do Club Shihan de Lugo, dentro dunha Selección Galega integrada por unha ducia de deportistas.

Próximamente, a fin de semana do 13 ó 15 de abril, vaise desputar en Benidorm (Alacante), os Campionatos de España Infantís coa participación de catro xóvenes karatecas do Akai Ryu: David Rico (campión galego en kata alevín); Nicolás Carnota (campión galego en kumite alevín); Raúl García (kumite infantil como campión galego), e Ildara García, campioa galega en kumite xuvenil. Todos eles acompañados da súa preparadora, Ainhoa Rodríguez como integrante do corpo técnico da Selección Galega de Kárate.

O Concello de Negreira ten aberto o prazo para a renovación de matrícula e de solicitude de novo ingreso, de nenos e nenas de 0 a 3 anos, na Escola Infantil Municipal para o curso 2018-2019.

O prazo de renovación de matricula vai dende o día 1 ó 15 de abril, e para novos ingresos será dendo o 1 ó 30 de abril. Deben presentar as solicitudes no Rexistro Xeral, na Casa do Concello, en horario de 9 a 14 horas.

A documentación necesaria pódese consultar a continuación.

O Concello de Negreira segue dando pasos para converterse nun municipio referente na ardua tarefa da inclusión das persoas. O último, sumándose neste ano 2018 por primeira vez, á campaña de sensibilización "Light it up blue" (ilumínao de azul), unha campaña de carácter internacional pola que edificios e monumentos emblemáticos de todo o mundo tínguense de azul, en apoio e solidaridade co colectivo de persoas con Trastorno do Espectro do Autismo (TEA) e as súas familias.

A iniciativa consistiu na iluminación de azul da fachada da Casa do Concello, o luns 2 de abril entre as nove e as doce da noite, no Día Mundial de Concienciación sobre o Autismo, no que Radio Negreira sensibilizou a veciñanza sobre o autismo falando con Elena Pérez, coordenadora do Servizo de Promoción da Autonomía Persoal (SPAP), da asociación Aspanaes, de Santiago, xunto con Raquel Quintáns e Ainhoa Rodríguez, veciñas de Negreira e que promoveron o proxecto para colocar un total de 304 pictogramas en edificios e instalacións públicas de Negreira, logrando a adaptación cognitiva dos espazos mediante debuxos e a súa descrición en castelán e inglés.

#ilumínalodeazul

Durante tres fins de semana consecutivas do mes de abril, Negreira acolle un curso sobre incendios forestais e urbáns dirixido a agrupacións de voluntarios de Protección Civil. Desenvolverase os días 7/8; 14/15 e 21/22 de abril, sendo impartidos en módulos teórico-prácticos por persoal cualificado na Casa da Cultura, e no parque empresarial de Cobas.

Coa colaboración do Concello de Negreira e maila Agrupación de Voluntarios de Protección Civil de Negreira, trátase dun curso descentralizado, promovido e financiado pola Academia Galega de Seguridade (AGAS), Emerxencias 112 Galicia e maila Asociación Provincial de Voluntarios de Protección Civil.

O Concello de Negreira informa que está aberto o prazo para a presentación de solicitudes para optar ás axudas que concede a Deputación da Coruña dentro do seu programa de subvencións a entidades sen ánimo de lucro para a realización de actividades culturais durante o ano 2018.

Os beneficiarios poderán ser:

Entidades de natureza cultural

Entidades de natureza veciñal (asociacións de veciños)

Entidades de natureza socioeducativa

Entidades de natureza social e/o asistencial

O prazo para a solicitude de dita convocatoria rematará o vindeiro 27 de abril do presente ano, ás 14:00 horas.

Para máis información e asesoramento, os interesados poden dirixirse á Axencia de Desenvolvemento Local, na primeira pranta da Casa do Concello.

A Primavera Deportiva-Cultural, é unha programación composta 26 actividades de deporte, teatro ou música, da que sobresae o Ciclo de Teatro 2018 con nove representacións repartidas entre os meses de abril, maio e xuño, todas elas no Auditorio do Centro Sociocultural, e nas que as entradas serán de balde, agás para as obras: Os Coleccionistas (20 de abril), e A culpa é do sistema (30 de abril), que teñen un prezo de 10 euros.

En abril destacan citas como a Xuntanza de gaiteiros (sábado 21), ás 20:30 horas co Liceo de Noia, a Escola de Gaita de Negreira e maila Escola de Ames; ou a Clausura das Escolas Deportivas (sábado 28), ás 16:00 horas no Pavillón de Pedra Mámoa.

Maio comezará coa presentación do libro ¨Catro décadas de fútbol do Negreira Veteranos¨, o venres 4 ás nove da noite no Auditorio, mentres que o sábado 5 celebrarase o Encontro dos maiores, e o sábado 12 a sexta edición da Copa Akai Ryu, destacando a presenza da Selección Española de Kárate, ou o acto de entrega dos Premios de Contos e Pintura Infantil (o martes 15); ou o XXI Torneo Intermunicipal de Fútbol Sala e mailo Concerto das Letras Galegas, da Banda Ateneo, ambos o sábado 19 de maio. O último domingo de maio celebrase o XXVI Día da Muiñeira, ás seis do serán na praza do Concello.

E para rematar, nas vésperas do verán, teremos un mes de xuño moi deportivo que comezará o sábado 2 coa Gala de Ximnasia Rítmica e maila final do Torneo Intercentros; o sábado 9 co III Triatlón Solidario e do 25 ó 27 co Campus de porteiros da SD Negreira. Entre medias, o domingo 3 actuará a cantante Tania Fuegho no Auditorio.

Consulta aquí toda a información:

· 

· Programación Primavera

· Cartel Ciclo de Teatro 2018

Este luns día 9 de abril, o Salón de Plenos do Concello de Teo acolle a fase eliminatoria do Club de Debate, coa participación de 18 alumnos de Terceiro e Cuarto da ESO, así como de 1º de Bacharelato pertencentes ao IES Xulián Magariños, acompañados pola profesora María Blanco Crespo, nunha actividade que financia o Concello de Negreira.

Haberá outros tres equipos do IES de Cacheiras e de Ferrol nunha xornada que comezará ás 9:15 horas, coa recepción oficial a tódolos participantes. O primeiro debate comezará ás 10:00 horas, e cada debate terá unha duración máxima de 36 minutos.

En total haberá nove debates en horario de mañá e tarde, xa que cada equipo terá que defender unha vez a postura a favor e outra a postura en contra sobre o tema: A mocidade tamén ten actitudes e comportamentos machistas.

Deste xeito, non se valora a defensa dunha postura concreta, senón a maneira en que se afronta o debate, os recursos oratorios que se empregan e a capacidade de argumentar fronte ás formulacións do equipo adversario.

O Club de Debate é un torneo que pretende formar o alumnado en habilidades comunicativas e oratoria, ademais de favorecer a utilización do galego oral en contextos formais e informais. Constitúe tamén unha oportunidade para compartir unha xornada lúdica e de aprendizaxe Este torneo, que pretende formar o alumnado en habilidades comunicativas e oratoria e favorecer o uso do galego oral en contextos formais e informais, é tamén unha oportunidade para compartir unha xornada lúdica e de aprendizaxe.

O xurado desta edición estará composto por Nel Vidal Barral, normalizador lingüístico; Xosé Luís Santos Cabanas, escritor; Xosé Manuel Pazo Blanco, representante da CENL de Ferrolterra; Olalla Liñares García, xornalista, e Luz Zas, profesora de Lingüística na USC.