O Concello de Negreira informa de que a empresa ENEL, a concesionaria do parque eólico de Corzán, acometerá a xestión da biomasa da zona ocupada polas súas instalacións, é dicir, as pistas de acceso ao parque e as franxas perimetrais de cada un dos aeroxeradores. O concello foi notificado dunha acta dirixida a administradora dende a Consellería de Medio Rural, na que se recorda a obriga de manter as súas instalacións en bo estado.

Esta obriga está recollida na lei 3/2007 do 9 de abril, no seu artigo 20 bis, de Prevención e Defensa contra os Incendios Forestais de Galicia, a cal establece que, “nas instalacións de produción de enerxía eléctrica eólica deberá xestionarse a biomasa na superficie afectada de pleno dominio e voo, de acordo co establecido no Plan sectorial eólico de Galicia, ao redor de cada aeroxerador de produción de enerxía eólica instalado.

Así mesmo, nos camiños interiores das ditas instalacións a xestión da biomasa vexetal, no estrato arbustivo e subarbustivo, farase nos cinco metros dende a aresta exterior do camiño. Neste último suposto, non se esixirá a retirada de árbores das especies sinaladas na disposición terceira.

A xestión da biomasa nas instalacións comezará nos próximos días tal e como obriga a lei mencionada anteriormente. Para calquera problema que poidan atopar os propietarios e propietarias das parcelas, poden poñerse en contacto co responsable do parque eólico, Fran, no número 672 376 186.

A Corporación municipal de Negreira gardou un minuto de silencio como acto de rexeitamento de todo tipo de violencia tralo asasinato do mozo Samuel Luiz, na cidade da Coruña. 

Os concelleiros e concelleiras expresaron a súa repulsa pola morte de Samuel ao rematar a sesión plenaria celebrada este luns 12 de xullo na Casa do Concello.

A súa Xira Máxica, que comezou en Pesadoira o pasado 4 de xullo e tivo dous pases na vila de Negreira durante as festas de San Cristovo, prosegue o seu percorrido polo concello. O mago Romarís ten catro datas confirmadas máis ao longo do verán: as máis inmediatas, no mes de xullo, terán lugar en Aro, o sábado 17, e en Logrosa, o sábado 31.

A xira continuará no mes de agosto por Covas, o día 7, Xallas, o día 8, e Portor, o día 15. Todos os pases serán celebrados nos locais sociais de cada parroquia ás 20:30 horas, cun aforo limitado. 

Á marxe destes espectáculos, o mago Romarís ofrecerá un curso de maxia para rapaces e rapazas a partir dos nove anos na primeira quincena de agosto. Será en Negreira e para grupos limitados.

A maior programación de danza de Galicia, Propulsa: Danza+Paisaxe+Patrimonio parará en A Ponte Maceira este domingo 18 de xullo con distintas actividades que se celebrarán no Pazo de Baladrón, ás oito da tarde.

Este evento do programa do Xacobeo 2021/2022, xestionada por Agadic · Xunta de Galicia, pretende enmarcar a danza e fomentar a creación contemporánea das artes do movemento en entornos de gran valor paisaxístico e patrimonial da comunidade para atraer a novos públicos, xenerar complicidade con administracións locais e crear oportunidades laborais para profesionais e compañías galegas.

O programa de espectáculos desenvolverase en 27 localidades distribuidas polas catro provincias coa exhibición de pezas de danza de profesionais. O proxecto tamén acolle a presentación de traballos de compañías convidadas de España e Portugal para, deste xeito, establecer vínculos con outros territorios profesionais

Os asistentes poderán gozar de espectáculos como “Voo” da bailarina acróbata Ánxela Blanco (30 min.); o abstracto “Feelings” de Janet Novás (18 min.); a proposta “Give it a spin” de Pisando Ovos co DJ Jas Processor (25 min.) que mestura diálogo e movemento entre un picadiscos e unha bailarina; e “Keep going” de La Macana (15 min.), un alegato á dinámica e unha mostra da esencia do movemento co corpo.

O evento é de balde pero as prazas serán limitadas, polo que os interesados en achegarse ao Pazo de Baladrón deberán inscribirse no WhatsApp do número 676 454 879 indicando os seus nomes e apelidos, DNI e un teléfono de contacto.

O servizo de Atención Temperá dos concellos de Negreira e Val do Dubra celebrou esta mañá, no Auditorio da Casa da Cultura, un pequeno acto coas familias dos rapaces e rapazas usuarias da unidade, que atende a vinte sete nenos e nenas de entre cero e seis anos en Negreira.

As traballadoras do servizo fixeron presentación dun breve vídeo que recompila varias das metodoloxías empregadas para atender á rapazada, ademais de repartir uns pequenos obsequios aos nenos e nenas. Con este acto, a unidade comeza un período de descanso ata o vindeiro mes de setembro, cando retomarán a súa actividade.

O servizo de Atención Temperá, ofrecido grazas ao convenio dos concellos de Negreira e Val do Dubra, realiza un traballo de diagnose e valoración de diversas dificultades ou trastornos de desenvolvemento en rapazas e rapaces de entre 0 e 6 anos. A unidade está integrada por profesionais da pedagoxía, psicoloxía, logopedia e fisioterapia, que traballan co fin de mellorar as capacidades comunicativas, psicomotrices e cognitivas dos nenos e nenas suxeitas ao programa.

A actividade do servizo desenvólvese de luns a mércores no edificio do antigo instituto de Negreira, na rúa de Castelao, e os xoves e venres, no Val do Dubra. A unidade permite que a rapazada que necesita desta atención non teña que pasar polas instalacións do Hospital Clínico Universitario de Santiago de Compostela, que os deriva directamente ao seu servizo local de referencia.

Volve unha nova edición dos campamentos de verán organizada polo Concello de Negreira e o departamento de Cultura e Deportes. Terán lugar en Boiro, no Albergue Xuvenil Espiñeira dende o 26 de agosto ata o 4 de setembro. Os rapaces e rapazas nados entre o 2006 e o 2010 poderán apuntarse na Casa da Cultura ou no teléfono 981 885 886 ata o día 13 de agosto.

En total, son 17 prazas dispoñibles baixo un custo de 60 euros. Os nenos e nenas que vaian asistir terán unha reunión informativa o luns 16 de agosto ás 20:30 horas no Auditorio Vello para ultimar todos os detalles sobre estas xornadas de verán.

As bolsas correspóndenlle á rapazada nada nos anos 2018, 2017 e 2016, que cursarán cuarto, quinto e sexto de educación infantil, respectivamente, nos dous colexios do concello: o CEIP O Coto e a Escola Unitaria de Aro.

O obxectivo destas dotacións, valoradas nuns setenta euros por rapaz, é facilitar ás familias con baixos recursos o acceso ao material escolar que necesiten. Estes cheques poderán ser empregados nas librarías de Negreira.

Os beneficiarios son toda a poboación residente e empadroada no concello dende hai polo menos seis meses, con escasos recursos e que non superen os baremos económicos establecidos:

• Para familias con dous convivintes o límite de ingresos é de 550 euros.
• Para as de tres convivintes, é de 700 euros.
• Para as de catro, 850 euros.
• Para as de cinco, 1000 euros.
• E para as de seis ou máis, 1150 euros.
• Ademais, no caso de que as familias teñan aluguer ou hipoteca, as cantidades poderán excederse nun máximo de 200€ mensuais.

Os impresos de solicitude estarán a disposición das persoas que así o queiran no departamento de Servizos Sociais, ao longo do mes de agosto. Para máis información poden chamar ao 881 035 159.

O obxectivo principal desta iniciativa, do Servizo de Voluntariado Social do Concello, é convocar á veciñanza do concello a doar ordenadores e outros equipos informáticos portátiles en desuso, para que poidan ser recuperados para o seu emprego durante o curso virtual.

O Concello garante a eliminación dos datos que puidesen conter os equipos cedidos. Para obter máis información ou para realizar doazóns, cómpre acudir á Oficina de Voluntariado do Concello, ou chamar ao teléfono 664 074 674.

González visitou a sede da corporación local e revisou os traballos de limpeza de masa forestal realizados ao longo desta mañá no polígono industrial de Covas, acompañado do director xeral de Defensa do Monte, Manuel Rodríguez. 

O alcalde, Manuel Ángel Leis, agradeceu a visita do conselleiro e destacou a importante rede de camiños e pasos secundarios cos que conta Negreira, á hora de facilitar a prevención de lumes e o acceso a núcleos, que pola orografía do concello son difíciles de comunicar. Sinalou que o concello conta con tres parroquias dentro das zonas prioritarias, Aro, Lueiro e Xallas, nas que estivo a empresa pública Seaga, e que contan coa posibilidade de incorporar algunha máis.

Pola súa parte, o conselleiro, José González, incidiu na cooperación entre institucións e entre os grupos da propia corporación local á hora de traballar na prevención dos lumes. Recalcou que a Xunta ten alugados uns trinta e cinco tractores, dos que se benefician dezasete concellos, un deles Negreira.

O acto celebrouse esta mañá no Salón de Plenos Municipal, onde estiveron presentes o alcalde de Negreira, Manuel Ángel Leis, representantes do departamento de Turismo e de Cultura e Deportes e da empresa de xestionar os postos da feira, Hípica Celta.

Nel, o alcalde oficializou a celebración da XIV edición da Feira do Románico que terá lugar do 3 ao 5 de setembro. Ademais de diversos obradoiros e postos de artesanía e hostalaría, os asistentes poderán gozar dunha ampla programación de actuacións musicais e actividades a pé de rúa que adiantarán durante as próximas semanas.

Para cumprir coa normativa covid, o Concello imporá novas restriccións que axuden a evitar aglomeracións, como prescindir de tabernas e chiringuitos e pechar a feira ás nove da noite para impulsar a restauración local. Tamén reforzarán a presenza das forzas de seguridade municipais e civís para supervisar o cumprimento das medidas establecidas.