A Consellaría do Medio Rural activou desde este mércores 16 de outubro, as comunicación e solicitudes para realizar queimas de restos agrícolas por parte de particulares e, tamén de restos forestais amoreados, tanto desde a web habilitada como a través do número de teléfono 012.

A comunicación debe efectuarse sempre con 2 días de antelación á data na que queira facerse a queima. E como é habitual, no portal web para comunicar as queimas de restos agrícolas os cidadáns deben confirmar que se trata dunha «queima correspondente a palla ou material natural, agrícola, non perigoso, utilizado en explotacións agrícolas ou gandeiras».

A maiores, tamén se retoman as solicitudes de autorización para efectuar queimas de restos forestais amoreados. Neste caso, como vén sendo habitual, fai falta contar con autorización administrativa, dado o maior risco da actuación con lume que queira levarse a cabo.

Desde Medio Rural lembran que tanto as comunicacións como as autorizacións deixarán de ter validez nos días que hai vento e altas temperaturas.

O Concello de Negreira xa ten ás persoas gañadoras do Concurso Fotográfico de Muller Rural. A iniciativa, que vai xa pola súa terceira edición, busca recoñecer o papel e contribución destas mulleres na promoción do desenvolvemento agrícola e rural, na mellora da seguridade alimentaria e na erradicación da pobreza no rural.

Nesta ocasión, Marian Souto Casais fíxose co galardón na categoría maiores, dirixida a persoas de máis de 18 anos. Acadou o primeiro posto coa súa imaxe 'As Marías facendo rixóns na lareira'. Na fotografía vese a dúas mulleres (ás dúas Marías) elaborando esta receita do xeito tradicional baixo a atenta mirada de Leire, unha cativa.

Pola outra banda, Nuria Lourido Romar acadou o galardón no apartado de rapazada, para menores de 18 anos. Neste caso, logrouno con 'Incansable', na que a protagonista é, precisamente, a súa avoa, á que define como "unha muller incansable que segue cultivando as súas propias legumes e hortalizas". Como explica a autora na descrición que achega xunto á instantánea, grazas aos produtos da súa horta, "na súa casa fame nunca se pasou". 

Aumentarase o numero de contedores e vanse facer campañas informativas nos vindeiros meses co obxectivo de promover a sostenibilidade e a concienciación ambiental. O obxectivo é facilitar á veciñanza a xestión selectiva de residuos ao tempo que cumprir coa lei 7/2022 de Xestión de Residuos que obriga a todos os municipios a cumprila.

Un dos aspectos máis salientables é que o Concello vén de reforzar a presenza de contedores básicos de recollida como son os orgánicos, o de cartón, plásticos ou vidro. Trátase de evitar vertedoiros incontrolados e conseguir que a recollida sexa o máis selectiva posible.

Entre as medidas figura a implantación en Negreira do contedor marrón, en particular, dentro do centro urbano. Por outra banda, implantaranse outros contedores como o amarelo, o azul ou o verde.

Estanse a preparar campañas de información sobre a correcta utilización dos distintos contedores. Continuarase coa recollida de voluminosos porta a porta para levalos ata o punto limpo.

Tamén seguirá a recollida de plásticos agrícolas durante 4 veces ó ano que supuxo no 2023 a eliminación de 35 toneladas de este tipo de residuos. Ademais, insistirase na recollida de outro tipo de lixo como téxtiles ou aceites orgánicos que os concellos están obrigados a xestionar.

O alcalde de Negreira, Manuel Ángel Leis Míguez destaca que  «con estas medidas, buscamos non só mellorar os servizos, se non fomentar unha cultura de responsabilidade ambiental, como así recolle o Pacto de Alcaldes do que formamos parte», subraiou o rexedor negreirés.

A Dirección Xeral de Patrimonio Natural da Xunta de Galicia publica hoxe no Diario Oficial de Galicia (DOG), a orde que autoriza a emerxencia cinexética do xabaril nos concellos de Negreira e A Baña, así como noutras 39 comarcas de Galicia.

Nestas zonas permitirase abater ou capturar sen límite exemplares de xabaríns de ambos os sexos, prioritariamente femias adultas e subadultas de calquera idade, e ampliaranse os períodos nos que se pode exercer a actividade cinexética.

A medida entra en vigoe este sábado 12 de outubro e manterase ata o 23 de febreiro de 2025. Ademais, será posible abater crías e femias sucesivas de crías a condición de que haxa unha autorización especial previa por parte da Dirección Xeral de Patrimonio Natural, de acordo con o establecido na lei de caza de Galicia.

Os cazadores terán autorizado o uso de medios auxiliares -como visores ópticos, detectores electrónicos de paso ou cebaderos de gran ou froitos colocados nos cultivos danados- que favorezan a eficacia e o óptimo aproveitamento cinexético, faciliten a identificación dos exemplares e garantan a seguridade das persoas.

Nas comarcas con declaración de emerxencia poderase autorizar aos propietarios afectados a realizar esperas e outra serie de medidas que complementen a actividade cinexética regrada e o control dos danos da especie establecida.

A falta dun censo oficial da especie a nivel autonómico, o incremento dos avisos e os datos de capturas obtidos, ao redor de 18.300 exemplares na tempada 2023-2024, xustifican esta decisión, segundo sinala a Xunta de Galicia.

A veciñanza de Negreira respondeu ó chamamento da Asociación de Empresarios (ENe), e mailo Concello de Negreira, mediante unha concentración diante da Casa do Concello este mércores pola noite, onde gardáronse cinco minutos de silencio en memoria de tódalas vítimas da violencia de xénero, durante os cales soou a canción Negra Sombra, do poema de Rosalía de Castro, interpretada por Luz Casal.

O acto que incluíu a lectura dun texto por parte de membros de ENe, pechouno o alcalde de Negreira, Jorge Jesús Tuñas Caamaño, agradecendo a presenza da veciñanza, e animándoos a denunciar calquer tipo de violencia sobre as persoas, así como a participar nos actos que desenvolve o Concello co gallo da conmemoración do Día Internacional para a Eliminación da Violencia sobre as Mulleres, cuxa continuidade terá lugar este venres e sábado.

O venres, coa proxección da curtametraxe Amar é sinónimo de respeto, realizada por alumnos do IES Xulián Magariños, ás 21.30 horas, no Auditorio do Centro Sociocultural, e acto seguido proxectarse o filme Amor, de Michael Haenacke.

O sábado, coa cuarta Andaina ¨Negreira camiña contra a violencia de xénero¨, que partirá ás 10:00 horas dende o Centro Sociocultural ata o Refuxio de Covas, e regreso ó mesmo punto polo paseo fluvial do río Barcala. Logo, ademáis dunha chocolatada que servirase para tódolos participantes, realizarase a entrega de premios do V Concurso Loita contra a Violencia de Xénero, aberto aos centros educativos do noso concello, establecéndose dúas modalidades: Relato curto e Cartaz gráfico.