O Concello de Negreira ten aberto o prazo para a renovación de matrícula e de solicitude de novo ingreso, de nenos e nenas de 0 a 3 anos, na Escola Infantil Municipal para o curso 2017-2018.

O prazo de renovación e solicitudes de novo ingreso vai dende o día 1 ó 30 de abril, debéndose presentar as solicitudes no Rexistro Xeral, na Casa do Concello, en horario de 9 a 14 horas.

A documentación necesaria pódese consultar no seguinte Bando da Alcaldía.

O Servizo de Voluntariado Social do Concello de Negreira vén de clausurar o seu Obradoiro anual de informática para adultos que foi impartido ao longo dos últimos meses nas dependencias da Casa da Cultura, a cargo dos voluntarios, José Ángel Nouche e Alicia Varela, ésta última, alumna do Ciclo Superior de Sistemas Informáticos en Rede, do IES Xulián Magariños.

O alcalde, Jorge Tuñas Caamaño, xunto co director do instituto, Adelino Pose Reino, e maila técnica do Voluntariado Social, Laura Plata, encargáronse da entrega de diplomas a tódolos asistentes a este periodo de formación que se prolongou dende o pasado mes de setembro.

A Axencia de Doazón de Órganos e Sangue (ADOS), fai un chamamento especial para doar sangue do grupo sanguíneo A negativo (A-), xa que as reservas están baixas, en vésperas das vacacións de Semana Santa. As reservas de Cero positivo (0+), Cero negativo (0-), e A positivo (A+), están en niveis normais, segundo informa ADOS.

Co fin de facilitar as doazóns de sangue, a Axencia de Doazón de Órganos e Sangue despraza este xoves 6 de abril a Negreira, unha unidade móvil que permanecerá nas inmediacións do Centro de Saúde, en horario de 10 a 14, e de 16 a 21 horas.

Lembramos que para doar sangue é necesario almorzar, e despois de xantar agardar 2 horas. En Galicia precisamos 500 doazóns cada día.

#Súmatedoasangue

A tarde do 24 de xullo de 2013, en vésperas do día grande de Galicia, o tren Alvia 04155 descarrilaba á entrada de Santiago de Compostela cun saldo de 81 falecidos e máis de 140 feridos. A verdade oficial sinala como único responsable ao maquinista. Pero unha traxedia nunca ten unha única causa... Qué hai detrás do accidente ferroviario máis grave da democracia española?

Frankenstein-04155 é unha longametraxe-documental,  impulsado pola Plataforma de Vítimas do tren Alvia 04155, coa producción de Boneca Lareta, e que tivo a súa estrea ao grande, como merece, nun dos festivais de cine máis prestixiosos e lonxevos de Europa, a Semana Internacional de Cine de Valladolid SEMINCI 2015 onde obtivo unha mención especial do xurado. Logo, tamén obtería o premio especial do público en CINEUROPA.

Trátase do penúltimo documental dentro do I Ciclo de Documentais Val de Barcala, organizado pola Asociación Cultural Afonso Eanes, e que poderemos ver este venres no Auditorio de Negreira. Tamén haberá, un coloquio posterior co seu realizador, Aitor Rei.

Aínda sendo unha actividade de balde, existe a opción da entrada solidaria: recolleranse alimentos non perecedoiros que logo serán doados ós Servizos Sociais Comunitarios de Negreira.

Data: Venres 7 de abril

Hora: 21:00

Lugar: Auditorio do Centro Sociocultural

Tráiler: https://www.youtube.com/watch?v=XtTVF0T8ErU

O Concello de Negreira fixo hoxe entrega da execución das obras para dotar ao pavillón do CEIP O Coto duns vestiarios e aseos, grazas a unha achega económica da Consellería de Política Social por un importe de 45.284 euros, aínda que o investimento total na actuación ascende a 60.379 euros, xa que a diferenza entre as dúas cantidades (15.000 euros) correspóndese coa parte que sufragou o Concello.

Con esta actuación, cóbrese unha demanda da comunidade educativa que estaba enriba da mesa do goberno municipal. Foi o alcalde, Jorge Tuñas Caamaño, e mailo concelleiro de Obras e Servizos, Manuel Ángel Leis Míguez, quenes fixeron entrega das chaves á directora do colexio, Amparo Mera.

O Concello fará uso das instalacións para o desenvolvemento de actividades das súas Escolas Deportivas Municipais e outros eventos. 

O Concello de Negreira vén de rematar os dous proxectos para compretar as instalacións do Comprexo Deportivo Municipal de Pedra Mámoa. Trala posta en funcionamento da segunda pista de pádel, vén de estrearse a cuberta da primeira cancha.

 Cun orzamento de 56.265 euros incluídos no Plan de Acción Social (PAS 2015), financiado pola Deputación da Coruña, instalouse a cuberta na primeira das dúas canchas habilitadas para a práctica de pádel, o que lle confire un maior uso a esta instalación coa que se compretan as melloras efectuadas no último ano no devandito comprexo de carácter municipal. 

O Pavillón de Pedra Mámoa acolleu o pasado sábado a gran festa anual da ximnasia rítmica na capital do Val de Barcala, cunha participación histórica de 200 nenas pola mañá na IV Gala, e de preto de 400 ximnastas na competición de tarde, no II Torneo Vila de Negreira.

Na mañá levouse a cabo a exhibición das ximnastas máis novas, entre elas, unha ampla representación da Escola Municipal de Negreira, acompañadas polos clubs de Oroso, Compostela, Squash e mailo colexio Os Tilos, de Teo, cun pavillón ateigado de público.

Á tarde, foi a quenda para a competición. Preto dunha trintena de clubs de toda Galicia déronse cita en Negreira. E pese ao gran nivel, a Escola Municipal tivo un papel destacadoacadando o terceiro posto en categoría Infantil/Cadete Escolar por conxuntos, e tamén un primeiro e terceiro posto, respeitivamente, en categoría Alevín individual, a cargo de Xiana García e de Lidia García.

O torneo que rematou ben entrada a noite do sábado, contou coa presenza do alcalde de Negreira, Jorge Tuñas Caamaño, acompañado polo deputado responsábel de Economía e Facenda na Deputación da Coruña, Antonio Leira, e mailo concelleiro de Obras e Servizos do goberno local, Manuel Ángel Leis Míguez, quenes foron os encargados de entregalas medaias e agasallos.

O Concello de Negreira abre o prazo para a retirar os convites de cara a asistir, á vixésima segunda edición do Encontro dos maiores, a celebrarse o sábado día 6 de maio, baixo unha gran carpa no Campo da Feira, e que inclúe unha misa na Capela do Cotón, seguida dun concerto e, do xantar popular de tódolos participantes, así como da animación musical ao longo da tarde.

Para asistir hai de prazo até o día 28 de abril para retirálos convites nas dependencias de Servizos Sociais, na pranta baixa da Casa do Concello (rúa do Carme, 3), en horario de mañá. É requisito imprescindible ter cumpridos os 60 anos de idade e estar empadroados/as no Concello de Negreira, así como ir acompañados do seu DNI para a retirada dos mesmos.

Como tódolos anos, haberá un servizo de autobuses que pasarán por tódalas parroquias do concello para trasladar aos participantes ata a festa, así como de regreso unha vez remate a xornada.

O grupo de música tradicional Treixadura, estará presente na XV Noite Folk de Negreira, o sábado 19 de agosto na Área Recreativa do Refuxio de Cobas, nunha edición especial co gallo de cumprirse os 15 anos do emblemático festival de música tradicional barcalés, onde o Concello de Negreira aposta por unha formación das máis importantes no eido da música de raíz en Galicia, con máis de 25 anos nos escearios e con seis discos no mercado, compartindo co público o poder e a forza do canto colectivo.

Acompañando a este grupo tamén actuará Uxia Senlle e o grupo Tiruleque.

Uxía Senlle e grupo

Uxía é considerada a grande dama da música galega e unha das maiores divulgadoras da súa poesía. Nos seus máis de 30 anos de carreira artística, renovou a música tradicional galega conectándoa coas culturas atlánticas, mesturando alalás con morna, fado e ritmos brasileiros. Desde a súa estrea con  Foliada de marzo  en 1986, o seu traballo representa un punto de encontro de diferentes culturas, e creou o seu repertorio a través das suas continuas viaxes e intercambios con músicos de Brasil, Portugal, Cabo Verde ou Guinea-Bisáu, como João Afonso, Dulce Pontes, António Zambujo, Rui Veloso ou Tito Paris.

Publicou 12 discos, recibindo importantes recoñecementos, entre os que destacan o Premio da Crítica Galicia 2016 ou o Premio a Mellor álbum de música de raíz nos Premios de la música independiente de España por Meu canto, seleccionado tamén como Top of the World pola revista británica Songlines. Entre outros proxectos, é a directora artística e alma mater do Festival Internacional da Lusofonía, Cantos na maré.

Tiruleque

Na primavera de 2002 nace como proxecto Tiruleque, consecuencia das inquedanzas musicais de cinco rapaces, todos eles chegados do mundo da música tradicional.Bebendo nas fontes desa tradición musical galega -tanto a través de recollidas como recurrindo aos cancioneiros- pero tendo tamén presentes outras moitas influencias, o grupo tenta fuxir de “etiquetas” que limiten a súa capacidade creativa, sentíndose simplemente identificado co termo “música galega” nun intento de clasificar o seu estilo.

Neste aspeito, a máxima de Tiruleque é acadar o seu propio son, identificable tanto en temas tradicionais como nas composicións propias, campo polo que o grupo mostra unha maior predilección.

O Concello programou un roteiro de sendeirismo pola Serra do Caurel (Lugo), o domingo día 30 de abril, a través da denominada Ruta do Río Pequeno, de 15,5 quilómetros de percorrido circular, e unha duración de 6-7 horas con unha dificultade técnica moderada.

Este roteiro visita lugares como: a aldea do Mazo; Cabanas dos Carballois; soutos de castañeiros; unha ponte de madeira e unha fervenza pequena; sequeiros de castañas; a aldea de Paderne e Mercurín, e mailo mirador do Castro de Brio.

A saída en autobús dende Negreira será a partir das 07:00 horas dende o Centro de Saúde (rúa de Castelao). Esta actividade ten un prezo por persoa de 5 euros, sendo necesario que cada participante leve a súa comida para a ruta.

Inscricións: no 981 885 886 ou en Cultura e Deportes.