Vai selo sábado 13 de outubro, durante todo día, cando amantes das míticas motos vespa e lambretta, cítense en Negreira para participar neste encontro que organizan un grupo de veciños coa colaboración do Concello de Negreira...

O programa de actividades comezará coa recepción aos participantes, a partir das 10.30 horas na Carreira de San Mauro, e coa exposición de motos ata as doce do mediodía en que partirán para realizar un roteiro en moto pola parte alta do concello, visitando lugares como o parque eólico do Corzán ou a zona de Campolongo.

A seguinte parada será para o xantar de irmandade de tódolos participantes ás dúas da tarde, no restaurante O Rueiro, en Vilaserío, na parroquia de Bugallido, onde haberá un sorteo de agasallos xentileza de Motos Antelo, de Negreira.

A partir das 16.00 horas comezará o segundo roteiro da xornada que levará aos participantes neste encontro por paraxes naturais como as de Pontemaceira e maila parroquia de Portor, para regresar á vila de Negreira cunha parada no Campo da Feira. Alí, a partir das 19.30 horas celebrarse un concerto a cargo do grupo Sexy Soviets, quenes interpretarán clásicos e himnos musicais dos setenta, oitenta e noventa.

O colofón a esta intensa xornada chegará pola noite, a partir das 22.30 horas no Bar O Cotón, cun sesión musical a cargo de Dj Edu Lambretta, e Dj Hugo Xixón.

A inscrición ten un prezo de 20 euros e pódese realizar ata o día 9 de outubro. 

Máis info en Negreira Scooter Run.

Entrevista a Carlos Fernádez (membro da organización).

Entre os máis de 6.000 peregrinos/as que no que levamos de ano pasaron pola Caseta de Información que o Concello de Negreira ten aberta ata o 15 de outubro na avenida de Santiago, este primeiro domingo do mes de outubro, tívemola agradable visita deste mozo chamado Sven, de Leipzig (Alemaña), quen aparte de solicitar información do Camiño de Fisterra-Muxía, achegouse a saudar a Cristina Ameijeiras, a persoa que a atende.

Sven comezou a sua pereginaxe en Leipzig, e non é a primeira vez que visita Galicia, nin tampouco Negreira, xa que Sven estivo varios anos vivindo na cidade de A Coruña e ten amizades en Cee. Por iso, tivo a ben facelo Camiño de Fisterra.

O vindeiro luns 15 de outubro remata o primeiro prazo reducido a 6€ para formalizar a inscrición na XXXIX Carreira Popular de Negreira ¨A Clásica¨, do domingo 11 de novembro sobre un circuíto de 5 quilómetros ao que os corredores/as darán dúas voltas no caso da proba raiña de 10.000 metros, e unha soa volta na proba de 5.000 metros.

A partir do día 16 e ata o 31 de outubro o prezo é de 7€. Do 1 ó 7 de novembro o prezo de inscrición é de 10€.

Lembramos que os participantes poden facer efectiva a inscrición nunha soa carreira (5.000 ou 10.000 metros). Todos os participantes na «Clásica» recibirán unha bolsa do corredor composta por: bolsa de polyester; camiseta técnica; pastel; batido e bebida isotónica.

Incríbete xa en: http://emesports.es/eve…/xxxix-carreira-popular-de-negreira/

O Scooter Run Negreira e mailo Concello decidiron aprazar ata novo aviso, o primeiro Encontro de vespas e lambrettas previsto para este sábado 13 de outubro, debido á previsión de mal tempo para devandita xornada do sábado na comarca de Barcala.

Segundo a organización, a idea é programar unha nova data para celebrar esta concentración de amantes das motos antigas e dos modelos citados para máis adiante, manténdose o programa de actos deseñado para a ocasión que inclúe sendos roteiros en moto polo noso concello, un xantar de irmandade, así como un concerto dun grupo musical e unha festa final nun establecemento da hostalaría de Negreira.

A mellora de servizos básicos é o principal destino dos fondos que recibirá o Concello de Negreira con cargo ao Plan Único (POS+2018).

Dende a súa creación no ano 2017, o Plan Único permite aos concellos unha flexibilidade total á hora de investir os fondos que lles asigna a Deputación da Coruña. «En lugar de propoñer unhas axudas específicas, a Deputación permite aos concellos escoller as súas prioridades», segundo explica o seu presidente, Valentín González Formoso, quen sinalou que a institución provincial «xoga un papel fundamental para axudar aos concellos a ofrecer máis e mellores servizos públicos fundamentais, financiando obras que moitas veces os municipios rurais non poderían acometer por si mesmos».

Neste sentido, o Plan Único permite paliar a carencia de axudas específicas para servizos que os concellos están obrigados a subministrar, coma as redes de sumidoiros ou o acceso aos núcleos de poboación, permitíndolles aos municipios destinar os fondos que estimen necesarios a estas actuacións.

O Concello de Negreira investirá 317.944,04 euros en dous proxectos:

1) Asfaltado e formigonado de pistas en San Vicente e outros.

2) Construcción dunha senda peonil entre A Barquiña e A Chancela.

A Deputación da Coruña destina este ano un total de 7.797,73 € a apoiar á agrupación de Protección Civil de Negreira, dentro das axudas publicadas hoxe no Boletín Oficial da Provincia para un total de dezaito agrupacións de Protección Civil, quenes reciben o apoio da Deputación para dotarse de novos equipamentos, entre aqueles concellos de menos de 20.000 habitantes.

En total, a Deputación da Coruña inviste 110.486 euros en dúas liñas de axudas co obxectivo de “fomentar a importante labor diaria e o gran servizo público que prestan, especialmente no ámbito rural os voluntarios destes servizos”, segundo destacou hoxe o seu presidente, Valentín González Formoso.

O BOP publica hoxe a concesión dunha destas liñas de subvencións, dotada con 81.447,03 euros e que está destinada a financiar investimentos que se realicen durante o ano 2018.

Trece agrupacións de Protección Civil recibirán entre 4.000 e 12.000 euros para a adquisición de equipamentos, equipos e ferramentas necesarias para os rescates e intervencións, elementos de transporte, materiais de comunicacións ou equipamento informático e aplicacións móbiles.

Un grupo duns sesenta camiñantes de Guimarães (Portugal), fixeron parada este domingo na Caseta de Información ó Peregrino para selar as súas credenciais. Tratouse dunha expedición que está a cubrir o Camiño de Fisterra por etapas,  e nesta primeira xornada cubriron os 21 quilómetros da etapa entre a Praza do Obradoiro e a vila de Negreira.

En Negreira, agardábaos un autobús para levalos de volta cara Guimarães. Nun mes agardan voltar ao Val de Barcala para facer a seguinte etapa que lle levará a cubrir o traxecto entre a vila e Olveiroa, xa no municipio de Dumbría.

Este grupo de Portugal foron dos últimos peregrinos en achegarse á Caseta de Información, que hoxe 15 de outubro, pecha as súas portas na presente tempada alta de camiñantes, despois da apertura da atención ao público a comezos do mes de maio, batendo os seus mellores rexistros.

As operadoras de telefonía móbil (Movistar, Vodafone e Orange), comezarán a ofrecer en Negreira servizos sobre a rede 4G na banda 800MHz, o que permitirá á veciñanza gozar de conexións móbiles de alta velocidade sobre tecnoloxía LTE (4G), cunha mellor cobertura no interior dos edificios e maior extensión xeográfica.

Para garantir a compatibilidade da nova tecnoloxía coa Televisión Dixital Terrestre (TDT), os operadores puxeron en marcha Llega800, entidade que é a encargada de solucionar calquera afectación na recepción do sinal de televisión.

Coa chegada do novo 4G a Negreira, continua o proceso de implantación que se está realizando de forma paulatina por toda a xeografía nacional. Para comprobar os concellos onde xa están activos estes servizos pódese consultar no enlace:

O despregue 4G enmárcase no establecido no Real Decreto 805/2014, de 19 de setembro, con data 1 de abril de 2015 na que se procedeu á liberación das frecuencias entre 790MHz e 862MHz (canles de 61 ao 69 de UHF), que ata entón se empregaban para a recepción da Televisión Dixital Terrestre, proceso tamén coñecido como Dividendo Dixital. A partir de entón, ditas frecuencias foron asignadas ás operadoras de telefonía móbil para prestar os seus servizos 4G.

Principais vantaxes

Coa rede 4G abriuse a porta a innovadores servizos e aplicacións, ademais de proporcionar significativas melloras tanto na velocidade de descarga, como de envío de datos, imaxes, música ou contidos audiovisuais de alta definición- ou permitir sacar o máximo partido a aplicacións online, como os videoxogos.

A nova xeración da tecnoloxía 4G tamén facilita a introdución de novos servizos no área empresarial e das administracións públicas, como aplicacións empresariais en movilidade con alto contido multimedia ou o uso da videochamada, entre outros.

Ademais a maior cobertura que alcanza o 4G na banda de 800MHz mellorará o servizo no interior de edificios e será a banda que permita estender xeográficamente o servizo de forma eficiente.

Para garantir esta compatibilidade, Llega800 presta aos cidadáns unha serie de servizos gratuitos que inclúen, por unha banda, unha actuación previa, grazas á cal os cidadáns que residan en zonas de maior afectación recibirán unha comunicación no seu domicilio que lles informará de que a partir dese momento poderán solicitar de forma gratuita a adaptación da antena do seu edificio para evitar posibles incidencias.

E, por outro, un procedemento correctivo, tralo aceso das estacións, polo que Llega800 encargarase de atender aos usuarios afectados xestionando e resolvendo posibles afectacións tamén sen custo algún.

Para xestionar estes servizos, púxose a disposición dos cidadáns un teléfono de atención gratuito:  900  833 999

E unha páxina web: https://www.llega800.es/index.php

O Boletín Oficial da Provincia da Coruña (BOP), publica na súa edición de hoxe venres 19 de outubro, o anuncio relativo ao levantamento de actas previas á ocupación de terreos pola expropiación na estrada DP 5603 Negreira a Marco do Cornado, de cara a execución do proxecto de sendas peonís polo Camiño de Fisterra-Muxía, nos seguintes catro treitos:

1) Punto quilométrico 1+430 ao 2+170

2) Punto quilométrico 7+300 ao 7+820

3) Punto quilométrico 8+750 ao 10+770

4) Punto quilométrico 11+110 ao 12+900

Cabe recordar que o Pleno da Corporación Provincial en sesión celebrada o día 23 de febreiro de 2018 aprobou o Plan de Sendas Peonís, na súa primeira fase, cun proxecto que ascende a 893.378 euros, ascendendo o valor da expropiación a: 119.116 euros.

O citado plan foi exposto ao público mediante anuncio publicado no Boletín Oficial da Provincia, e non téndose formulado reclamación algunha referida a esta obra, e polo que cítase, a fin de proceder ao levantamento das actas previas para determinar os dereitos afectados, o valor destes e os prexuízos determinantes da rápida ocupación, aos titulares dos bens e dereitos afectados, cuxas fincas e superficies totais en metros cadrados afectadas, aparecen na relación de titulares.

O lugar será a Casa da Cultura de Negreira, o o xoves día 8 de novembro de 2018, en horario de 16:30 a 19:00 horas.

Ao devandito acto deberán acudir os titulares afectados, persoalmente ou ben representados pola persoa debidamente autorizada para actuar no seu nome, achegando os documentos acreditativos da súa titularidade: Documento Nacional de Identidade; Tarxeta do Número de Identificación Fiscal e o último recibo do Imposto sobre Bens Inmobles (IBI), podendo facerse acompañar á súa costa, se o estiman oportuno, dos seus peritos e notarios.

Anuncio BOP