Humorista, monologuista, actor, reporteiro-entrevistador, presentador, pregoeiro…son algunhas das facetas de José Manuel Rodríguez Puente, coñecido artísticamente por Isi. Este estradense, que é un auténtico showman, protagoniza este venres 11 de outubro, a primeira cita do Ciclo de Monólogos 2019 que continuará nos sucesivos venres do mes de outubro con Manuel Manquiña e Federico Pérez.

Isi subirá ao escenario do Auditorio de Negreira este venres, a partir das nove da noite, e as entradas a un prezo de seis euros, poden retirarse na Delegación de Cultura, e o mesmo venres, antes da función na entrada ao Centro Sociocultural.

Isi Rodríguez é, un dos humoristas máis queridos e coñecidos de Galicia, grazas ás súas participacións en programas de entretemento da Televisión de Galicia, como SuperMartes, Air Galicia, Land Rober ou Todo queda na casa.

Isi, cóntanos a súa vida e historias dun modo cercano, distendido e con toda a súa impresionante capacidade torácica que lle permite falar durante horas sen perder o sentido.

Un contahistorias do cotiá capaz de chegar tanto ó público rural como urbano grazas á súa simpatía e cercanía, que lle axudan a converter en éxito calquera festa.

Camiño de Cantares é unha iniciativa promovida pola Asociación Cultural Ciclo de Música Barcia de Mera, co obxectivo de promover o coñecemento e difusión da música vocal na contorna da cultura xacobea, levando concertos a localizacións significativas histórica e artísticamente de todos os roteiros do Camiño de Santiago en Galicia. Todos os concertos son de entrada libre ata completar aforo, xa que está incluido no programa O teu Xacobeo, da Xunta de Galicia, e conta co apoio da cooperativa CLUN.

O coro de cámara compostelán Vox Stellae, do que forma parte o xoven compositor negreirés, Marcos Mato Collazo, abre os seus concertos de Camiño de Cantares este venres 11 de outubro, ás 20:30 horas, na Capela do Pazo do Cotón. Precisamente, unha das pezas que soará é obra súa e, vai ser estreada nesta actuación de Voz Stellae, coro de cámara que está dirixido por Luís Martínez, e que interpretará obras de Handl, Brito, Leopolita, Morais, Palestrina, Vitoria ou Benayas nun programa titulado In festo Sancti Jacobi, que reúne composicións realizadas para as solemnidades de Santiago o Maior: a do 25 de xullo, que conmemora o seu martirio, e a do 30 de decembro, que conmemora a translación dos seus restos.

Non só se trata de difundir, investigar ou interpretar o xa escrito, senón tamén de estimular a composición contemporánea de música relacionada coa cultura xacobea, é por iso que Camiño de Cantares encargou dúas obras vocais ao xoven compositor galego Marcos Mato, que estrean as agrupacións Vox Organalis e Vox Stellae.

A caseta de turismo do Concello de Negreira pechou a tempada 2019 este mércores, 15 de outubro. O punto de información turística, situado na avenida de Santiago ao paso do Camiño, pecha a tempada 2019 con 7803 persoas atendidas en arredor de 6 meses, nos que mantivo un horario de apertura de 11 a 14 h e de 16 a 19 h tódolos días.

En abril o total de persoas foron 735, cun 54% procedentes do estado español, seguido en importancia por Portugal, Alemaña, Italia e Francia. En maio atendéronse 1045 persoas, cun 32% procedentes do conxunto de España, seguido de Italia, Alemaña, Francia e Portugal. En xuño pasaron pola caseta 1381 visitantes, cun 42% do conxunto de España, seguido de Italia, Alemaña, Francia e Portugal. En xullo, foron atendidas no punto de información 1182 persoas, das que o 53% ven de territorio español, seguido de Italia, Francia, Alemaña e Irlanda. En agosto, 1608 persoas solicitaron información turística, cun 59% de España, seguido en importancia por Italia, Portugal, Francia e Alemaña. En setembro foron atendidos na caseta de turismo 1301 visitantes, cun 48% de España, seguido de Italia, Alemaña, Francia e Portugal. Na primeira metade de outubro, 551 persoas recibiron información turística. Cun 45% de España, seguido de Italia, Portugal, Francia e Alemaña.

A gran maioría dos visitantes solicitan información sobre o Camiño de Santiago a Fisterra e Muxía e piden o selo da credencial; tamén adoitan buscar aloxamento, onde destacan os albergues públicos, información sobre medios de transporte e que ver na nosa contorna, así como determinados servizos.

Os países emisores que máis presenza adoitan ter despois de España son Italia, Alemaña e Francia e Portugal, mentres que entre as provincias quen máis nos visitan son Madrid, Barcelona e a propia provincia da Coruña.

Preto do 90% das persoas atendidas son peregrinos que chegan a pé facendo o Camiño; o resto de visitantes repártense entre os que fan o Camiño en bicicleta e as persoas que viaxan en medios de transporte a motor, como algunhas excursións de grupos que chegan á vila de Negreira.

Por outra banda, o Albergue de Peregrinos de Negreira continúa aberto durante todo o ano, de xeito que a previsión de ocupación para este ano 2019 é a de alcanzar os 5000 peregrinos aloxados. Coma tódolos albergues da Rede Pública de Albergues do Camiño de Santiago en Galicia, abren tódolos días as súas portas ás 13h e teñen un prezo por persoa de 8 €, establecido pola Xunta de Galicia.

Continúa por segundo venres consecutivo, o «auténtico» Ciclo de Monólogos, dentro da programación do Outono Cultural do Concello de Negreira, en sesións a partir das 21.00 horas no Auditorio do Centro Sociocultural. Trala xornada inaugural co humorista Isi Rodríguez, este venres 18 de outubro é a quenda de Manuel Manquiña, con entradas a 6 € que podense retirar na Delegación de Cultura e o propio venres na billeteira.

«Relatos clásicos de Manquiña» é o título do segundo dos monólogos co inigualable actor e humorista Manuel Manquiña (Airbag), quen será a primeira vez que actúe en Negreira. Comezou a súa carreira profesional en programas humorísticos da Televisión de Galicia (Xabarín Club, Era Visto!, Os vixilantes do Camiño), e en varias películas dirixidas por directores galegos como Antonio Blanco e Xavier Villaverde. O seu salto á fama chegoulle polo seu papel na película Airbag, en 1997 e dirixida por Juanma Bajo Ulloa, con frases xa míticas na historia do cinema nacional.

A Consellería de Política Social, a través da Dirección Xeral de Maiores e Persoas con Discapacidade organiza este programa de promoción do envellecemento activo e convivencia, destinado ás persoas maiores que se atopen soas nestas datas, xa sexa por carencia de familiares ou amigos, perda do seu cónxuxe ou por outras circunstancias.

Prazas e destinos

Ofértanse un total de 260 prazas distribuídas do seguinte xeito:

•    105 na Residencia de Tempo Libre do Carballiño (Ourense), para as persoas solicitantes das provincias de Lugo e Pontevedra.
•    105 na Residencia de Tempo Libre de Panxón, en Nigrán (Pontevedra), para as persoas solicitantes das provincias de A Coruña e Ourense.
•    50 no Complexo Residencial Xuvenil Lug II (Lugo), para as persoas solicitantes da provincia de Lugo.

Datas e servizos

Este programa levarase a cabo entre o día 23 de decembro de 2019 e o día 7 de xaneiro de 2020 e comprende os seguintes servizos:

•    Estadía na residencia durante 16 días (15 noites).
•    Aloxamento en habitacións compartidas e manutención en réxime de pensión completa.
•    Desprazamento en autobús desde os lugares que se establezan nas localidades que corresponda (Santiago, A Coruña, Ferrol, Pontevedra, Vigo, Lugo ou Ourense) ata a residencia de tempo libre que se lle adxudique e viceversa.
•    Actividades de animación sociocultural.

A recollida das persoas participantes efectuarase o día 23 de decembro pola tarde e a volta o día 7 de xaneiro despois do almorzo.

Persoas beneficiarias

a.    Ter 60 anos, cumpridos no momento en que remate o prazo de presentación de solicitudes.
b.    Estar empadroado nalgún concello galego.
c.    Vivir so no seu domicilio e ter que pasar só/a as datas do Nadal.
d.    Valerse por si mesmo e non padecer enfermidade transmisible con risco de contaxio, nin trastornos mentais ou condutuais non compensados que poidan alterar a convivencia durante o transcurso da estadía.

Para a selección dos participantes daráselle preferencia ás persoas que:

•    Perderan ao seu cónxuxe ou persoa coa que convivisen nos últimos anos.
•    Teñan máis idade
•    Teñan un menor nivel de ingresos económicos.
•    Non participaran no Programa Xuntos polo Nadal en pasadas edicións.

Solicitudes

O prazo de presentación será ata o día 15 de novembro incluído, nos Servizos Sociais Comunitarios do Concello de Negreira.

Prezos

As persoas participantes que teñan uns ingresos inferiores ao IPREM (537,84€/mes), asistirán de forma gratuíta ao programa, mentres que aquelas cuns ingresos superiores a dito importe contribuirán ao pago da estancia coa achega de 50€.

Continúa a programación do Outono Cultural do Concello de Negreira, e este venres 25 de outubro faino coa última sesión do Ciclo de monólogos, a partir das 21.00 horas, co actor Federico Pérez, polo que as risas están máis que garantidas. As entradas a un prezo de 6 € pódense retirar na Delegación de Cultura.

Cousas miñas

É o título do monólogo que pon colofón este 2019 ao exitoso ciclo de Negreira co actor Federico Pérez, moi querido por terras de Barcala e Xallas, cuxa familia é oriunda de Mazaricos. Coñecidas son as súas participacións en series de éxito da TVG como Padre Casares e o seu papel de Moncho, en Era visto; ademáis de en Libro de familia, Mareas Vivas ou Air Galicia, pero Federico é tamén un artista inquedo por natureza, que fai teatro, ou humor negro con Curtis e Teixeiro e ata ten un dúo musical con Marcos Pereiro.

O Concello está a executar o proxecto do Fondo de Compensación Ambiental para a mellora da eficiencia enerxética que financia a Consellería de Industria. Cun importe de 59.897 euros foi adxudicado á firma Grupo Mariño e, beneficiará á contorna da praza do Concello e maila rúa do Carme.

De feito, as obras comezaron este luns coa apertura de zanxas para as conduccións eléctricas na praza: Vanse a instalar tres columnas con varios focos cada unha para mellorar a iluminación en todo o recinto.

A actuación inclúe ademáis, a colocación de trece novas columnas de báculos en toda a rúa do Carme e mailas entradas á praza, potenciando a iluminación nocturna nunha das zonas máis transitadas. Unha das características máis chamativas do proxecto é que se instalarán cinco proxectores para o realce da Casa do Concello que, segundo informa o goberno local, permitirán cambiar a cor da iluminación para eventos conmemorativos.

A Consellería de Economía, Emprego e Industria, e maila Asociación Galega de Organismos de Control Autorizados (ASCOGA), informan que están a desenvolver unha campaña de difusión para lembrar aos locais de pública concorrencia, da obrigatoriedade de realizar inspeccións das instalacións eléctricas de baixa tensión cada 5 anos.

A seguridade industrial é unha das pancas de mellora do noso tecido empresarial. Por iso, recoméndase contactar cun organismo de control autorizado para efectuar a inspección, se non a ten feito xa.

A Consellería de Economía, Emprego e Industria, lembra que a falta de revisión das instalacións eléctricas de baixa tensión pode poñer en perigo a seguridade das persoas, e ademais, supón unha infracción grave e sancionable.

A presente convocatoria ten por obxecto a concesión dos premios do IX Concurso de relatos curtos e cartaces gráficos ¨Loita contra a violencia de xénero¨, promovido dende o Concello de Negreira, a través do Centro de Información ás Mulleres (C.I.M.), co fin de sensibilizar á veciñanza sobor desta lacra social.

O prazo de presentación de traballos é o comprendido dende o 21 de outubro até o 21 de novembro, e no certame poden participar tódalas persoas menores de 18 anos, e os traballos presentados deberán entregarse no Centro de Información ás Mulleres, nun sobre pechado, facendo constar un número de teléfono de contacto e en ningún caso deberá aparecer o nome da persoa participante. A identificación do autor/a levarase a cabo mediante o uso dun pseudónimo.

Entre tódolos traballos recibidos, un xurado independente seleccionará os gañadores de cada modalidade e concederá os seguintes premios:

- Premio ó mellor relato curto: Vale agasallo por importe de 100 euros a utilizar nunha tenda de Negreira.

- Premio ó mellor cartaz gráfico: Vale agasallo por importe de 100 euros a utilizar nunha tenda de Negreira.

Entrega de premios

O sábado día 23 de novembro ao remate da oitava Andaina ¨Negreira camiña contra a violencia de xénero¨, no Centro Sociocultural.

A organización contactará previamente cos premiados/as por teléfono para que asistan ó acto de entrega e recollan o seu agasallo persoalmente.

Pódense consultar as bases do concurso premando aquí:

O pleno da Deputación da Coruña aprobou, cos votos favorables de PSdeG-PSOE, BNG, Marea Atlántica e Alternativa dos Veciños e abstención do PP, as bases reguladoras do Plan Único do vindeiro ano (POS+2020), que distribuirá inicialmente 47,2 millóns de euros entre os concellos da provincia.

Ao concello de Negreira correspóndenlle inicialmente, unha cantidade de 594.624 euros, pois trátase da achega inicial do Plan Único 2020, que como todos os anos irá incrementándose progresivamente ao longo do exercicio coa incorporación de remanentes, pero que permite aos 93 concellos da provincia planificar os seus orzamentos municipais e investimentos de cara ao vindeiro ano, ao contar dende xa cunha previsión mínima de ingresos por parte da Deputación que poderán destinar, en función das súas necesidades, á execución de obras, ao financiamento de parte do gasto corrente dos seus servizos básicos, ou a sanear as economías municipais amortizando débeda con provedores ou entidades bancarias.