O salón de plenos da Casa do Concello acolleu hoxe o acto de entrega da edición da obra gañadora na convocatoria de 2022 do Certame de poesía “Xosé M. López Ardeiro”, que recaeu en Caderno de camiño, obra do escritor, profesor e xornalista, Xosé A. Neira Cruz. Ao premio económico de 2.500 euros que xa foi entregado en decembro pasado polo Concello de Negreira, súmase agora a publicación do poemario gañador coa entrega dun lote de 300 exemplares.
Este acto serveu ademais, para a convocatoria da XII edición do certame, cuxo prazo de presentación de obras estará aberto desde o mes de xullo ao de decembro de 2023. Poderán participar nel, as obras poéticas escritas en lingua galega, orixinais e inéditas, cunha extensión de entre 350 e 700 versos como máximo.
A obra gañadora recolle 51 poemas distribuídos en seis capítulos: Subida polos anos; Un pestanexo do inverno; Parada no medio do trebón; Aprender a ulir a chuvia; Polo arame dun raio de sol e Arrastrando séculos sumados.
Na entrega participaron o alcalde de Negreira, Manuel Ángel Leis Míguez; o director xeral de Cultura da Xunta de Galicia, Anxo M. Lorenzo; o presidente do xurado, o crítico e escritor José Antonio Ponte Far, e o tamén poeta e membro do xurado, Xulio López Valcárcel, que tamén fíxoo en representación de Medulia Editorial, responsable da edición da obra.
Anxo M. Lorenzo salientou o perfil do gañador: “Unha persoa que forma parte da Real Academia Galega, profesor e investigador, cunha ampla bagaxe literaria, e autor de máis de trinta obras de creación”, subraiou Anxo M. Lorenzo.
Xosé A. Neira Cruz: “É realmente unha honra sumar o meu nome a ese elenco xa importante de autores e autoras, que a súa vez sumaron os seus nomes ao de Pepe Ardeiro. Estou moi agradecido”, afirmou.
O alcalde negreirés, Manuel Ángel Leis Míguez, pechou o acto dicindo que agarda que este ano “continúe o certame, estea quen estea na alcaldía, e sigan colleitando o éxito das últimas edicións con tantas obras presentadas”, subraiou Ángel Leis.
Audio do acto
