Dende o Concello de Negreira queremos agradecer unha vez máis a colaboración solidaria da Asociación de Amas de Casa, que por undécimo ano consecutivo, promove a campaña de recollida de alimentos non perecedeiros para axudar ás familias con menos recursos; a través da súa entrega ao departamento municipal de Servizos Sociais para o posterior reparto entre as familias que máis o precisan.
A campaña foi activada o luns 15 de novembro e prolongarase ata o día 9 de xaneiro de 2022. Acéptanse toda clase de alimentos non perecedeiros como aceites, leite, cereais, cacao, conservas, legumes, patacas, cebolas, así como productos de hixiene persoal. Os establecementos colaboradores coa campaña son os seguintes:
• Casa Lula• Supermercado Gadis• Supermercado Eroski• Supermercado Froiz• Supermercado Día
O pasado ano, a achega a Servizos Sociais roldou os catro mil quilos de víveres, grazas á recepción de alimentos aportados por particulares e sobre todo por negocios locais como Carnicerías Suso, que aportou en dúas quendas, un total de catrocentos quilos de carne; a cooperativa Clun (Feiraco), que aportou trescentos litros de leite; ou Cáritas de Santiago, quen entregou 1.500 quilos de patacas e medio cento de polos, así como Distribucións Fajín Lama SL, que aportou alimentos á campaña. Tamén agradecen a colaboración solidaria de establecementos como Lunares e Pecas, doando prendas de roupa para nenos, ou José Alvite Lema, quen entregou a recadación obtida pola venda do seu libro: “O que me tocou vivir”, destinada a paliar as necesidades da rapazada de familias con menores recursos económicos.
Para contacto coa campaña o número de teléfono é: 659 180 323
Imaxe: Arquivo
